D Nid-Fasnacht-Fasnacht

Ein Text von Lena und Schöli, Danke!

Friti dr 28.2.2020 oder ischs doch eher friti dr 13.? 

13.00h es gmüetlechs chrämi zmittag mit guete Fründe. Vorfröid uf die füfti jahreszyt. die schönschti zyt im jahr. 5 täg „keine Termine und immer leicht einen sitzen“. 

4 stung später. 17.00h. d schöli u i stönis im brand vis à vis. die nöie pistole die nöie schablone, die nöi farb, parat zum schminke. mir u aui angere parat zum schminke. nume d fasnacht isch es nid.

17.15 trotz auem trudle die erschte pousis i. mir schminke glich, gö zäme i spanier u trinke es glas wy. die einte gränne, die angere lache im grundgno herrscht gueti stimmig. aber es isch äbe glich nid ganz s gliche. 

20.00 mir hei gässe. ire haubstung würde mr nis parat mache für uf roggu. d wehmuet stigt wieder. dr präsi u d tambis froge öb mr glich chli wei fasnachte? aber chame de fasnachte ohni fasnacht?zögerlech seit me jo, bis mr nis aui eire meinig si. mir probiere zfasnachte.

so fiire mr ou ohni fasnacht u haut nume bis am mänti die füfti johreszyt. aui zäme mit weni gespiele, viu ztrinke, immer wieder nöie schminkidee u viu guete u luschtige gspräch gniesse mr die haut 4 schönschte täg im johr. 

am mändi am haubi 1 ir nacht lige mr nis i de arme. es komischs gfüu.. 4 tag lang kostüm, schminke, lache, brüele, ässe, trinke. so viu hei mr gha u glich het so viu gfäut. zögerlech trennt me sech. jede i sini richtig u nid wie süsch aui zäme no is james. me winkt sech no einisch. u de isch sie verbi. die nid fasnacht fasnacht wo mr när trotz auem chli hei versuecht zfasnachte. 

es paar täg später simernis aui einig: so schön wies ou gsi isch, das bruche mr auso kes zwöits mau!